Ua vauvau atu te fa'atere hau no te Fa'arava'ira'a faufa'a, no te Tāpura Faufa'a e no te Faufa'a i te tahi parau ha'apapa no te fāito o te moni ho'o o te mā'a no te 'āva'e tetepa 2026.

I te 'āva'e tetepa 2026 nei, te fāito 'āmui no te moni ho'o o te mā'a o tei topa ri'i 0,2 % e tei mau i ni'a i te 112,23. te tumu rahi o teie nu'ura'a no te topara'a ia te moni ho'o o te mā'a (-1,0 % e no te mau tūha'a o te utara'a (-2,3 %).

Mai te 'āva'e tetepa 2025 e tae mai i te 'āva'e tetepa 2026, te fāito moni 'āmui o te ho'o 0,1 %. I ni'a i nā 'āva'e 'ahuru mā piti i haerehia mai au noa to na nu'ura'a e +0,3 %.

Ua mara'a te fāito moni 'ōhipa 0,1 % ia fa'aauhia i te 'āva'e i ma'iri e tei topa 0,4 % ia fa'aauhia i te 'āva'e tetepa 2025 ra.

Te fāito no te moni tārahu o te fare (ILP) o tei mau i ni'a i te 110,23 i teie 'āva'e e tei topa 0,6 % i ni'a i te ho'ē matahiti. Te fāito o te moni tārahu o te mau fare toa (ILC) o tei mau i ni'a i te 113,50 e tei topa 0,2 % i ni'a i te ho'ē matahiti.

Te topara'a o te moni ho'o o te mā'a no roto mai ia i te 'ōtohera'a no te moni ho'o o te mau hotu o te moana 10,1 % i te 'āva'e i ma'iri a'e nei. Te itira'a mai te mau tārifa no te utara'a na te reva o te mau rātere (-29 %) o te tumu ia i 'ōtohe ato'a ai te fāito ta'ato'a o te moni ho'o. Te moni ho'o no te ū, te pata paāri e te huero moa (-1,2 %) e no te mau rau-ota (-0,7 %) o tei topa ato'a.

Ua fa'ati'ahia teie mau topara'a o te moni ho'o o te mā'a na roto i te mara'ara'a o te moni ho'o o te 'i'o 'animara (+0,8%), te faraoa e te mau mā'a huero (+0,7 %) e te mau mā'a hotu (+2,6 %). Ia 'iritihia te parau o te mā'a, te vai nei te mau tere manureva ho'o māmā (+10,5 %) e te mau tūha'a tāmāra'a e te tāta'ira'a i te nohora'a (+5,7 %) o tei mara'a ato'a i te 'āva'e tetepa nei.

I ni'a i te ho'ē matahiti, te nu'ura'a no te fāito 'āmui o te moni ho'o o tei ta'a 'ē e to Farāni.

Ua vauvau atu te fa'atere hau no te Fa'arava'ira'a Faufa'a, no teTāpura 'Ōhipa e no te Faufa'a i te ho'ē puta parau no te fāito o te moni 'ōhipa i roto i te Patura'a e te mau 'Ōhipa a te Hau (BTP) no te 'āva'e tetepa 2026.

I te 'āva'e tetepa 2026 nei, te fāito 'āmui o te moni 'ōhipa o te “BTP” o tei mau  i ni'a i te 137,53, tei mara'a 0,1 % i ni'a i te ho'ē 'āva'e.

Te tumu o teie nu'ura'a no te mara'ara'a ia o te moni ho'o o te mau tauiha'a fare (+0,1 %) pa'epa'ehia e te mau tauiha'a 'āuri (+0;4 %) e te uira (+0,2 %, na reira ato'a o te mara'ara'a i te moni o te mau tvinira'a (0,2 %), arata'ihia e te mau tūha'a tävinira'a i te mau taiete 'ōhipa (2,7 %). I roto i nā 'ahuru mā-piti 'āva'e, ua mara'a te fāito 'āmui o te moni 'ōhipa o te “BTP” e 2,4 %.

I roto i te Patura'a, te fāito o te moni 'ōhipa no te tūha'a o te 'ōhipa rārahi na reira ato'a tō te tūha'a 'Ōhipa i raro mai o tei mara'a 0,1 % ia fa'aāuhia i te 'āva'e i ma'iri a'e nei. I ni'a i te 'ahuru mā-piti 'āva'e, ua mara'a te fāito o te moni 'ōhipa i roto i te Patura'a +0,8 %.

I roto i te mau 'Ōhipa a te Hau  ua mara'a te mau te fāito o te moni no te mau 'Ohipa 'āivana'a e te mau 'ōhipa 'aravihi 0,1 % ia fa'aāuhia i tez 'āva'e 2026. i roto i nā 'āva'e 'ahuru mā-piti, ua mara'a te fāito 'āmui o te moni ho'o o te mau 'Ōhipa a te Hau e 4,4 %.

Ua vauvau atu te fa'atere hau vahine no te Ha'api'ira'a, no te Ha'api'ira'a Teitei, e no te Hīro'a Tumu i te ho'ē fa'aarara'a parau no te fa'atupura'a i te 3ra'a no te Te Kai, e mahana no te mau ti'ara'a 'ōhipa no te fāri'ira'a rātere e no te ravera'a mā'a i Porinetia nei, mā te 'āpiti i te 'Ōro'a o te 'ihi.

I te mahana maha 15 no ātopa 2026 nei, e fa'atupu te 'Āmui-tahira'a no te mau Pū fa'aineinera'a i te mau ti'ara'a 'ōhipa i roto i te Hōtēra-te Ravera'a mā'a-te Fāri'ira'a Rātere no Patitifā nei (CMQP) i teie nei mahana i te Fare Ha'api'ira'a Tua-toru no Porinetia farāani (UPF).

Te pāhono nei teie mahana i te tītaura'a i te pae no te tihepura'a i roto i te mau ti'ara'a 'ōhipa i roto i te Fāri'ira'a rātere, i te hōtēra e te fare tāmā'ara'a, te fifi nei ho'i te mau fa'atere o teie tūha'a 'ōhipa i roto i te tihepura'a i te feiā rave 'ōhipa fa'aineinehia. Hau i te 300 mau pIahi no Tahiti e Mooorea o te 'āmui atu. Ua fa'anaho ato'a te Fa'aterera'a rahi no te ha'api'ira'a (DGEE) i te tahi ha'apūrorora'a ti'a, no te mau pīahi o te mau motu, ia ti'a ato'a ia rātou ia fāna'o i teie nei fa'anahora'a.

E vauvau ato'a mai te feiā e 'ōhipa nei i roto i teie tūha'a i tōrātou mau tōro'a e te mau fa'aineinera'a e au no te tītau i teie mau tōro'a, i te mau pīahi no te piha 4 ihoa rā.

Mā te 'ōhipa 'āmui e te Ta'urua no te 'ihi, fa'ata'ahia i teie matahiti i te “aminamina o te 'ite”,  e fa'a'ite mai Te Kai e e 'iriti te 'ihi i te mau hi'ora'a i roto i te mau tōro'a no te fa'aineinera'a i te mā'a. Na te ho'ē 'orometua ha'api'i i te pae no te mau mā'imira'a rau no te Fare Ha'api'ira'a Tua-toru no “Paris-Saclay” e rautī i te mau fa'a'ite'itera'a no te pae o te mau mā'imira'a no te fa'aineine te mā'a mā te fa'a'ōhipa i te mau mā'a o te fenua nei.

E rave rahi mau fa'anahora'a o te haere mai e fa'arava'i i ta na tūha'a, ii roto i te 'ōpuara'a Tech KAI. E fa'anaho ato'ahia te tahi piha 'ōhipa no te fa'aineinera'a mā'a ia au i te tuatāpapara'a a te 'ihi no te mau pīahi tuatahi piha CM1 e te CM2 no Hitia'a o te rā. Te tupu te mau 'āi-tauira'a e te mau 'orometua ha'api'i no te fare ha'api'ira'a Hōtēra i ni'a i te fa'a'ōhipara'a i te ha'api'ira'a no te mau mā'imira'a rau i roto i te fa'aineinera'a mā'a.

E piti ato'a nau piha 'ōhipara'a o te 'iritihia i te mau pīahi o te Tua-rua, ho'ē no ni'a ia i te mau mā'a no terā ra tau, rautīhia e te taote no te pae o te mau 'ōhipa tahito e vahine mā'imi i te Pū mā'imira'a no teie nei ao no te mau tauiha'a tahito  i Porinetia nei (CIRAD), e te tahi no ni'a ia i te mau tōro'a no te maita'ira'a o te mā'a, na roto i te rāve'a o te tahi tāupo'o e te pāruru mata e ti'a ai ia māta'ita'i i te hōho'a i roto.

E 'āmui te ho'ē rurura'a rahi, o te matara no te ta'ato'ara'a, i te ho'ē 'orometua ha'api'i no te mau mā'imira'a rau, ho'ē vahine 'aravihi i te pae no te fa'aineinera'a i te mā'a e te ho'ē ti'a no te pae no te hamanira'a i te mā'a, mā te fa'a'ōhipa i tā tātou mā'a tumu. E vauvau mai teie nei rurura'a rahi i te mau hina'aro o te 'ōpuara'a Tech KAI no te tunura'a mā'a i Porinetia nei.

Ua vauvau atu te fa'atere hau vahine no te Ha'api'ira'a, no te Ha'api'ira'a Teitei e no te Hīro'a Tumu i te tahi mau parau mana o te ha'amana i te mau tauturu moni no te pae o te fa'a'ōhipara'a i te mau tā'atira'a hīro'a tumu, i te mau fare ha'api'ira'a e i te ma pū tū'aro.

• I te pae no te hīro'a tumu, e amo teie mau tauturu moni i te mau ta'urua no te pae o te hīro'a tumu.
• I te pae no te ha'api'ira'a e amo teie mau tauturu moni i te ha'amaita'ira'a e te amora'a i te mau tauiha'a no te mau fare ha'api'ira'a.
• I te pae no te tū'aro, e amo teie mau tauturu moni i te mau 'ōpuara'a no te tū'aro e te 'ea.

Ua vauvau atu te fa'atere hau vahine no te Tū'aro, no te Feiā 'Āpī, no te Araira'a i te mau 'Ōhipa 'Ī'ino i te tahi mau parau mana o te ha'amana i te fa'ata'ara'a i te mau tauturu moni no te pae o te fa'a'ōhipara'a e no te fa'a'ōhipara'a i te mau pū tū'aro e rima 'ī.

• I te pae no te tū'aro, e pa'epa'e teie mau tauturu moni, i te pae no te fa'a'ōhipara'a, i te mau terera'a 'ōhipa a te mau 'āmui-tahira'a e te mau tā'atira'a i tāpurahia e e amo, i te pae no te fa'ahotura'a, i te ho'ora'a mai i te tauiha'a.
• I te pae no te rima 'ī, e amo teie mau tauturu moni i te tere o te feiā rima 'ī i roto i te mau fa'a'ite'itera'a 'ōhipa.