Te Peretiteni

Mā'tihia o ia i te 12 no mē 2023 ra e te 'Āpo'ora'a Rahi o Porinetia farāni, o Moetai Brotherson ia te 'ahuru mā va'ura'a o te peretiteni o te Fenua, e o ia ato'a te ti'a 'āpī roa a'e o tei amo i teie ti'ara'a.

Fānauhia o ia i te 22 no ātopa 1969 i Pape'ete, e 'orometua ha'api'i tamari'i to na metua vahine, e utuutu ma'i to na metua tāne, ua fa'aineine o ia ia na i Farāni, 'ōhipa atu ai i to na tōro'a 'āivāna'a i te pae o te roro-uira e te ha'apararera'a parau i te fenua Tāpōnē, i te fenua Heremani e i te Fenua Marite, hou a ho'i mai ai o ia i te fenua nei. Ua riro mai o ia ei Mero 'āpo'ora'a 'ōire no Fa'a'a i te matahiti 2014 ra, ua mā'itihia o ia ei Mero no te 'Āpo'ora'a 'Iriti Ture i te matahiti 2017 ra, Mana fa'ahou mai o ia i te matahi 2022 ra, e i muri mai ua mā'itihia o ia ei Ti'a no te 'Āpo'ora'a Rahi no Porinetia farāni nei i te matahiti 2018 ra. I te 'āva'e mē 2023 ra, ua mā'itihia o ia ei Peretiteni no te Fenua.